استنزاف المشاعر ::----
كام مرة طلع صوت صرخة من جوة صدرك وقال..
كفاااية.
كفاية استنزاف لمشاعرنا
كفاية تيجوا علينا بزيادة
كفاية تعبنا ومفاضلش عندنا طاقة..
لكن تقف الصرخة وتتخرس على لسانك قبل ما تخرج
وكأنك بتبدلها بابتسامة عشان خايف على زعل اللي قدامك ..
..خايف تفقده .
ورغم كدة ترجع تاني لاستنزاف قلبك اكتر واكتر عشان ترضي كل اللي حواليك.
.. في اللي بيستنزف مشاعرك بدعوى الصداقة.
..واللي بيستنزف مشاعرك بدعوى القرابة.
..واللي بيستنزف مشاعرك بدعوى الحب.
لكن استنزاف المشاعر المه اشد ووقعه اصعب
دايما استنزاف طرف لمشاعر طرف اخر بيكون سببه بخل الطرف الاول ف المشاعر وخوف الطرف التاني من فقدان الطرف الاول
وكل ما بيبخل ..كل ما بتخاف انت على العلاقة وتدي اكتر واكتر
... مرة ورا مرة بتصبح انت مطالب بالعطاء
(والعطاء هنا بدون مقابل)
لو مرة اتأخرت او تعبت بتكون انت المقصر
محدش بيفكر انت ليه مبتتعاملش بالمثل..
.. لان انت اللي اتعودت على العطاء
انت اللي دايما بتسال
انت اللي دايما بتتصل
انت اللي دايما بتصالح
وانت اللي دايما بتقرب
انت اللي دايما بتحافظ على خيط رابط بينك وبين شخص عزيز عليك
انت اللي عودته على انك دايما متاح
ودا بيقويه ويخليه يتقل ويبعد ويقسى
...انت بتكون عارف انك غلط
وعارف انك بتدي اكتر من اللازم
وعارف انك بتيجي على نفسك
.. اوقات عقلك وكرامتك يقفوا قدام قلبك ويتناقشوا معاه ويرفضوا تصرفاتك
لكن قلبك بيستعطفهم ويقول هندي اخر فرصة
وللاسف مبتكونش اخر فرصة
بتستسلم اكتر واكتر لانك خايف تخسره
بتيجي على نفسك عشان تحافظ على علاقة انت بس اللي خايف عليها
انت اللي محافظ على الخيط الاساسي فيها انه ميتقطعش
....ودا فشل كبير في ادارة اي علاقة
.:-* ولو ف يوم قررت توقف...
الخيط دا هيتقطع .. وهتنتهي علاقتك بناس كتير وهيتهموك انت بالتقصير والتغيير
محدش بيفكر ف الفعل
كله بيلوم بس رد الفعل
لكن كل دا بيحصل بعد ما بتكون خلاص استنزفت اخر قطرة مشاعر ف قلبك
بعد ما يكونوا فعلا خلصوا عليك
.... الانسان الدائم العطاء توقفه عن العطاء قاسي
لانه بعد ما بيكون بيدي كل حاجة وكانه بيسحب من روحه جزء جزء لحد ما يقرب ينتهي...
بيفوق وينتفض ويقف على رجله
لكن بيكون زي الوحش ..مخيف..مرعب..
بياخد وبس
..هو بيعمل المستحيل عشان يحافظ على اللي بيحبهم
عشبان كدة يوم ما بياخد قرار الرحيل... مبيندمش
بينَدِّم كل اللي استهون يوم بمشاعره
بيتحول من مدافع لمهاجم
(بلاش تدي اكتر مما ينبغي .. لانك بتاخد اقل مما تستحق)
بلاش تيجي على نفسك لحد ما نورك ينطفي
لانك هتعيش ف عتمتك لوحدك
وهما هيعيشوا في نور غيرك لانك خلاص مفيش منك استفادة
والأصعب لو نوروا لغيرك طريقه بالنور اللي استمدوه منك
ساعتها هتدور على اللي حواليك وقتها مش هتلاقي حد
احذروا انتفاضة الطيب العطّاء لأنها اقسى مما تتوقعوا
واعلموا ان استنزاف المشاعر مع من لا يستحق -- اكبر جريمة في حق النفس
(سلاما على قلوب انكسرت ومات كل ما فيها..
فانتفضت لتقوى على كل من كان يؤذيها)
ليست هناك تعليقات:
إرسال تعليق