أ حسن نا آسف
ساعات الحب بيخبط
على قلوبنا بدون مواعيد
فنتبرجل ونتلخبط
ويغرق قلبنا فى تنهيد
ما بنفكرش ليه وازاى
وهل ينفع نحب بجد
ما بنبصش على ظروفنا
هينفع إن نعشق حد
ولا بنطل ع الواقع
وإيه ممكن وإيه فى الإيد
وفى الآخر
بنصحى بجلطه فى قلوبنا
بتنشل منا محبوبنا
وتسرق حد فيه دوبنا
وتبقى قلوبنا م المطاريد
يا مليون آهه بتقطع فى جوانا
بتسلب منا أرواحنا وترمينا
بتولد زومبى فى حشانا
وللزومبى نكون أسرى
جيناته البارده سكنانا
ما بنحسش ونتألم
ولا بنغلط فنتعلم
ومهما كستنا ملابسنا
فبرضو قلوبنا عريانه
قلوبنا رافضه حتى تدق
ولو شعلنا فيها النار
بتفضل برضو بردانه
مصيرنا نعيش هنا أموات
نعيش زومبى فى دواخلنا
لحد اللحظه ما تقرب
نموت فى سكات
أنا آسف عشان حبيت
بقيت زومبى فحبك مات
ليست هناك تعليقات:
إرسال تعليق