ة ‏‎Nanees Geneedy‎‏.

تنهيدة روح

زعلان؟ 

من نفسك ولا على نفسك؟
بتلوم روحك ولا اللي حواليك؟
مين اللي ظلمك؟

غالبا بتكون انت ظلمت نفسك ...
لانك غالبا بتكون شايف النهاية وبتغمض عنيك
..كل موقف بيحصل بتكون عارف انه هيحصل وشايف تفاصيله

لكن بتكابر وتبص للفرحة اللي تحت رجليك ..بتغمض عنيك عن اي علامة بتقولك اقف وكفاية كدة 

..بتتمنى العمر يقف بيك في مرحلة معينة انت سعيد فيها
بتتمنى تقول لكل ساعات الكون ارجوكي بطلي تحركي العقارب
.. بيكون نفسك تترجى الشمس وتقولها متغروبيش ..انا معرفش ايه اللي هيحصل لما تطلعي تاني

... بتنسى ان لا السعادة بتدوم ولا الحزن بيدوم
كله بياخد وقته ويعدي
..بتنسى ان الانسان عايش عشان يمر بدا وبدا

_بتنسى تجهز نفسك واعصابك وارادتك ليوم هتحتاجهم فيه جدا 

..بتحط كل طاقتك فانك تحصل على اكبر قدر من السعادة ف المرحلة اللي انت فيها 

ومتعرفش انك كل ما بتفرح اكتر وتطير من السعادة فوق اكتر
التمن هيكون اغلى والواقعة هتكون اشد 

...وبعد ما بتخلص المرحلة دي ونبدا ندخل في مرحلة دفع الحساب
مرحلة السكوووووت..وتلقي الضربات بمنتهى الاستسلام
الدنيا توديك يمين وشمال ودموعك محجرة وبتقول لنفسك
(انا اللي عملت ف نفسي كدة)

_روحك بتتوه
_نفسك بيتخنق
_قلبك بيتحرق
_شكلك بيتغير
_عنيك بتزوغ مبتركزش ف حاجة بتكون مفتح لكن مش شايف
_احساسك بيتلاشى
بتبطل تحس لا بتفرح ولا بتزعل ولا بتحب ولا بتكره
كله عندك زي الفل
_بتبطل تحلم ..مانت اصلا بطلت تفرح..فهتحلم ليه ؟ عادي بقى
يعني لو حققت حلمك هيحصل ايه!!!!
_بتبطل تهتم
بتبطل تشغل بالك بحد اللي يجي يجي واللي يروح يروح
_بتبطل تتكلم ...بتكره الكلام
وبتكون ف اسوا حالاتك لو حد قعد معاك ووجهلك كلام .... بتكون عاوز تقوله ابوس ايدك اسكت متكلمنيش مليش نفس ارد ولا عندي طاقة اتكلم
بترد على موضوع طويل عريض بكلمتين وابتسامة صفرا 

_بتبدأ تُقبل على خسارة الناس بارادتك .. بتدور على اسباب وطرق لخسارة اللي حواليك
_بتبص لنفسك في المرايا مش عارفك
مانت تايه من نفسك ... دا حد غيرك ..حتى طبعك اتغير

_بتقفل على قلبك ب١٠٠ قفل
بتخاف تتكلم مع حد وترتاح .. بتخاف يكونلك صديق مش عاوز تتكلم مع حد ..انت مرتاح في حالة الوحدة دي

هيجي عليك وقت ومن كتر ما هتتظاهر بالسعادة والاشراق وان مفيش حاجه فارقة ان اقرب الناس ليك يبطلوا يحترموا حزنك
ومش هيفهموا انك ممكن تكون بتمر بفترة صعبه
هتبقي مش عارف الغلط منك ولا منهم
الغلط منك عشان خبيت ولا منهم عشان عملوا مصدقين هتفضل كدا لحد ما هتتعود انك اما تتعب شويه تقفل عليك اوضتك ومش هتقول انك تعبان ولا هتستنجد بحد ولا مرة هتقول الحقوني
و لما تكون متضايق و تخرج مع أصحابك مش هتخليهم يحسوا أن فيك حاجة و هتحاول على قد ما تقدر تخبي وتداري
، هيبقي كل اللي بتفكر فيه انك مبقتش عايز حد يشيل همك او يشفق عليك حتى ف اصعب الاوقات ، بس هيبقي نفسك تقولهم انا هفضل شايل نفسي ومخبي حزني وهمومي بس لما اجي أقولكم أنا زعلان لازم تكونوا عارفين إن الحمل تقيل فعلاً و تحترموا صمتي

للاسف ....
عمرك اتسرق منك
سعادتك ممسكتهاش
بنيت. بنيت .وفي الاخر اتهد فوقك 

لحظات السعادة اللي مكتوبالك في عمرك قضيتها في وهم
قضيتها في حالة توهان
.....لو تعرف ان السعادة بمقدار معين .وبتخلص ..
كنت عملت حسابك
لكن للاسف بنتفاجيء ان كل حاجة خلصت
وبدانا ندفع التمن
ويا ترا باقي في عمرك اللي هيقدر يسدد دينك؟

ولا عمرك هيخلص وانت لسة بتحاسب على الفاتورة!!

#نانيس_جنيدي