النص دا سري
ويجوز ما سطرهوش
النص دا حبري
يمكن ما يكتبهوش
الناس بقت أقنعه
متعدده ووشوش
أحاسيس ماليها الكدب
زي السنين بتبوش
رغاويها ع الفاضي
خدعيتني في الماضي
بكلام كتير مغشوش
النص دا يزعل
أشخاص ما يتعدوش
علشان كده سري
علشان كده حبري
لما اختبر صبري
في النص ما نصفهوش
النص ده مني
انساه فيهزمني
وادوسه يألمني
دا نص ما بحبوش
النص ده كاشف
منظوم علي الناشف
بيقول كلام واقف
بائس ما زوقتوش
النص دا يوجع
خلي اللي خان يشبع
قلبه الحجر يدمع
بأنين حزين يسمع
كل اللي ما سمعتوش
النص دا يرجع
لنصوص كتير تتبع
نصي اللي جاي أشجع
وبدون خجل ورتوش
النص ده بتاعي
صارخ بأوجاعي
لكن مفيش داعي
يصرخ في وسط وحوش
النص ده واضح
سري لكن فاضح
نصي الأليم صادح
مع إني ما نطقتوش
نصي بلون دمي
شايل جبال همي
حالف ما هيسمي
علي حد يوم خاني
وكسرني ما كسرتوش
النص كان سري
يا مشاعري ليه تقري
يا دموعي ليه تفري
خبيت سنين مري
نصي ما خبتهوش
ليست هناك تعليقات:
إرسال تعليق